Terra e mar combínanse na costa de Dexo-Serantes dando como resultado a existencia de fermosas paisaxes cheas de vida e nas que se reúnen destacados trazos xeomorfolóxicos e relevantes elementos de flora e fauna.

A paisaxe é o recurso por excelencia deste espazo natural do concello de Oleiros, que, xunto á súa riqueza biolóxica, fixeron que se declarase esta costa Monumento Natural no ano 2000. Actualmente, conta ademais con outras figuras de protección: Zona de Especial Protección dos Valores Naturais e Lugar de Importancia Comunitaria, polo que está integrado na Rede Galega de Espazos Naturais Protexidos.

O obxectivo desta web é axudar non só ao coñecemento e desfrute deste espectacular lugar, senón tamén ao coidado dos seus valores e á persistencia destes no tempo.