No espazo natural destaca a paisaxe de acantilados fortemente erosionados e de perfil serrado, onde se combinan as caletas e enseadas, algúns illotes e impresionantes covas mariñas ou furnas como as de Ollo Grande, A Regocha e Ollo Pequeno, localizadas no Seixo Branco. As furnas constitúen un ambiente de especial importancia, xa que aves como o corvo mariño cristado, cun elevado interese científico e conservacionista, elixen lugares como este para instalar o seu niño. Todos estes trazos fan da zona un enclave de enorme interese paisaxístico, principal motivo polo que a Xunta de Galicia decidiu declaralo Monumento Natural.

En relación co valor botánico do espazo, os cantís e as zonas chás por encima deles atesouran unha estupenda representación de pasteiros e matogueiras das costas atlánticas. Manteñen diversas comunidades ben conservadas nas que aparecen varios endemismos galaicos e do noroeste da península Ibérica.

Existen ademais varias colonias de aves típicas de acantilados entre as que destacan especies de elevado interese pola súa reprodución escasa ou moi localizada en Galicia, tales como o andoriñón real ou o lagarteiro.

A relevancia e singularidade deste espazo natural vese potenciada por atoparse enclavado nunha das zonas máis densamente poboadas e transformadas de Galicia, na área metropolitana da cidade da Coruña.