O Seixo Branco

O nome do Seixo Branco vén dado pola existencia dun gran filón de cuarcita, o único existente na costa de Dexo-Serantes. Este filón, moi chamativo polas súas dimensións e a súa cor branca, corta claramente o acantilado de xisto, trazo polo cal os especialistas na materia lle asignan unha orixe posterior á Oroxenia Hercínica.

O mar labra covas no acantilado

Labradas nas paredes rochosas do acantilado aparecen as furnas, covas mariñas que se orixinan polo continuo desgaste que xera a forza da ondada. As partes máis brandas e débiles do acantilado degradaranse máis rapidamente que as rochas próximas, e é nelas onde se orixinan, pouco a pouco, as furnas, que evolucionarán desde estados incipientes a verdadeiras cavidades que se meten na terra. Ás veces, en etapas máis evolucionadas do proceso de erosión, prodúcese a unión de dúas covas contiguas, quedando illados anacos do acantilado en forma de illotes. Este fenómeno tamén é observable na costa de Dexo-Serantes.

En ocasións, o teito da cova derrúbase, dando lugar a impresionantes ocos no terreo. Neste tipo de furnas orixínase un pozo ou conduto vertical que conecta a superficie co fondo da cova. Exemplos diso son as furnas de Ollo Grande, A Regocha e Ollo Pequeno, todas elas localizadas no Seixo Branco.